എന്താ ഈ www2 ?

ഫെസ്ബുക്കിലെ ആസ്ട്രോ കേരളയുടെ ഗ്രൂപ്പില്‍ ഞാന്‍ ഇങ്ങനെ ഒരു ലിങ്ക് കണ്ടു.... 

UNESCO Astronomy and World Heritage Webportal - Home

www2.astronomicalheritage.net

Welcome to the new integrated web portal for the Astronomy and World Heritage Initiative, launched on August 24, 2012 during the sessions of the IAU’s

അപ്പൊ തോന്നിയ സംശയമാണ് എന്താ ഈ www2. കുറെ നേരം ആലോചിച്ചു...ഗൂഗിളില്‍ സേര്‍ച്ച്‌ ചെയ്തു...ഒക്കെ ഇംഗ്ലീഷ്.നമ്മടെ മലയാളത്തില്‍ കിട്ടുമോ എന്ന് നോക്കി...എവിടെ...? അവസാനം ഗതി കേട്ട് ഞാന്‍ ആസ്ട്രോ കേരളയുടെ ഗ്രൂപ്പില്‍ ഒരു പോസ്റ്റ്‌ ഇട്ടു...

"മാഷ്മാരെ ഒരു സംശയം.....എന്താ ഈ www2 .world wide web (www) നു ശേഷം വന്ന പുതിയ സംഭവമാണോ? 

ഈ വെബ്‌സൈറ്റിന്റെ അഡ്രസ്‌ നോക്ക്:

 http://www2.astronomicalheritage.net/"

അപ്പോള്‍ തന്നെ നമ്മുടെ ആസ്ട്രോ കേരളയുടെ പഴയ സെക്രട്ടറി ശ്യാം സാര്‍ ഒരു Comment ഇട്ടു.

പ്രിയ ആബിദ്‌, നല്ല നിരീക്ഷണം. സംശയം ഉയര്‍ത്തിയതിനു നന്ദി. www2 വിനെ കുറിച്ച് പറയുമ്പോള്‍ www (വേള്‍ഡ്‌ വൈഡ്‌ വെബ്) വിനെക്കുറിച്ചു കൂടി പറയേണ്ടതുണ്ട്. ഡിജിറ്റല്‍ രൂപത്തില്‍ പരിരക്ഷിച്ചു വച്ചിട്ടുള്ള വരികള്‍ - ചിത്രങ്ങള്‍ - ശബ്ദം - മള്‍ട്ടിമീഡിയ - പ്രോഗ്രാമുകള്‍ - അങ്ങനെ എന്തും പരസ്പര ബന്ധിതമായ കമ്പ്യൂട്ടര്‍ നെറ്റ് വര്‍ക്കുകളിലൂടെ പങ്കു വയ്ക്കുക/ലഭ്യമാക്കുക എന്നതാണല്ലോ ഇന്റര്‍നെറ്റ്‌ എന്ന സംഗതിയുടെ ചുരുക്കം. ഈ വിവരങ്ങളും, ഇന്റര്‍നെറ്റ്‌ ഉപയോഗിക്കുന്നവരും ഒക്കെ ഒക്കെ ഉള്‍പ്പെടുന്ന - അല്ലെങ്കില്‍ തമ്മില്‍ തമ്മില്‍ ഹൈപ്പര്‍ ടെക്സ്റ്റുകള്‍ വഴി ബന്ധിപ്പിക്കപ്പെട്ടിരിക്കുന്ന സംവിധാനത്തിനാണ് വേള്‍ഡ്‌ വൈഡ്‌ വെബ്‌ എന്ന് പറയുന്നത്. ഇന്‍റര്‍നെറ്റില്‍ നിന്ന് നമുക്ക് ഏതെന്കിലും വിവരം/സൈറ്റ് ഒക്കെ വേണം എന്നുണ്ടെങ്കില്‍ നമ്മള്‍ നല്‍കുന്ന ഒരു വെബ് വിലാസം (യു ആര്‍ എല്‍ -) വഴി ആണ് അതിലേക്ക് എത്തിച്ചേരുന്നത്. www എന്നത് ഈ വിവരങ്ങള്‍ സൂക്ഷിച്ചു വച്ചിരിക്കുന്ന സെര്‍വര്‍/ അല്ലെങ്കില്‍ ഡൊമൈന്‍ ആണ്. അപ്പോള്‍ www2 എന്നത് ഒരു ഹോസ്റ്റ് നെയിം (ഒരു കമ്പ്യൂട്ടര്‍ ശൃംഖലയില്‍ നിന്ന് ഒന്നിനെ തിരിച്ചറിയുവാനുള്ള പേര്) ആണ്. www എന്ന സെര്‍വറിന്‍റെ ലോഡ്‌ കുറയ്ക്കുവാന്‍, ട്രാഫിക്‌/ -,തിക്കും തിരക്കും ഒഴിവാക്കാന്‍ ഒക്കെ ഒരു സബ് സെര്‍വര്‍ ആയി ആണ് www2,www3 തുടങ്ങിയവ ഉപയോഗിക്കുന്നത്. എന്‍റെ പരിമിതമായ അറിവാണ് ഇത്. പല സാങ്കേതിക പദങ്ങള്‍ക്കും കൂടുതല്‍ വിശദീകരണം വേണ്ടി വരും. ഇത് പോലെയല്ലാതെ മനുഷ്യനു മനസിലാവുന്ന ഭാഷയിലും രീതിയിലും പറയുകയും വേണം. ഇവിടെ, ഈ ഗ്രൂപ്പില്‍ ഇഷ്ടം മാതിരി, നല്ല , കഴിവുറ്റ ടെക്നിക്കല്‍ പുലികള്‍ ഉണ്ട്. അവര്‍ കൂടി ഇടപെട്ട് കുറച്ചു കൂടി കൂട്ടിച്ചേര്‍ക്കലുകള്‍ നടത്തി ആബിദിനും മറ്റുള്ളവര്‍ക്കും കൂടി വെളിച്ചം പകര്‍ന്നാട്ടെ.....|| വി എസ്

ഹാവൂ...ആശ്വാസം...എന്നിട്ടും മൂപ്പരുടെ ക്ലാസ് തീര്‍ന്നില്ല....പിന്നേം തുടങ്ങി... 

ശ്രദ്ധേയമായ ഒരു സംഗതി കൂടി ഇതിനോടൊപ്പം കൂട്ടി ചേര്‍ക്കാന്‍ ഉണ്ട്. ഒരു പക്ഷെ അധികമാര്‍ക്കും അറിയാത്ത ഒന്ന്. വേള്‍ഡ്‌വൈഡ്‌വെബ് ആശയങ്ങള്‍ പിറവി എടുക്കുന്നത് നമ്മുടെ കണികാ പരീക്ഷണ പദ്ധതി കേന്ദ്രമായ ജനീവയിലെ സി ഇ ആര്‍ എന്‍ (CERN) ല്‍ ആണ്! Tim Berners-Lee എന്ന ഗവേഷകന്‍ 1980 കളില്‍ സേണില്‍ നടക്കുന്ന ഗവേഷണ രേഖകളും മറ്റു വിവരങ്ങളും ഒക്കെ പരസ്പരം കൈമാറാനും ഒരു ഡാറ്റാബേസില്‍ സൂക്ഷിച്ച് വേണ്ടപ്പോള്‍ ഉപയോഗിക്കാനും പരിഷ്ക്കരിക്കാനും ഒക്കെ ഉദ്ദേശിച്ച് ഉണ്ടാക്കിയ ഒരു കമ്പ്യൂട്ടര്‍ ശൃംഖലാ സംവിധാനം ആണ് പിന്നീട് ഈ രൂപത്തില്‍ നാം ഇന്ന് കാണുന്ന വേള്‍ഡ്‌വൈഡ്‌വെബ് അല്ലെങ്കില്‍ ഇന്റര്‍നെറ്റ് ഒക്കെ ആയി വളര്‍ന്ന പ്രതിഭാസത്തിന്റെ ആദിമ രൂപം! കൂടുതല്‍ വിവരങ്ങള്‍ ഇവിടെ വായിക്കൂ : http://info.cern.ch/